Ruth Lesson 1

Ruth 1

Dr. J. Vernon McGee

     Iei porausen Ruth, emon fopwul seni Moab.  I a likitalo ekkewe kot chofona me ekkewe uluulun anu seni Moab, o a feilo Israel.  Me ren ekkewe chon Israel, ekkewe chon Moab ra chon mwalechelo me noun mwalechelo.  Nge Ruth a fang manawan ngeni ewe Samol Kot, ewe Koten Israel.  Usun Boaz a apasa lon Ruth 2:12, “...Ewe ka feito ren pwe kopwe op fan poukassin.”

     A wor ruanu sopwun mi mwochomwoch lon Ruth, nge ei pwuk mi mwochomowch a fokkun watte manamanen porausan.  Lon ei pwuk sia kaeo usun uruwon An ewe Samol Jesus Kraist kewe leewo, pun I mwirimwirin David.  Lon ei pwuk sia kaeo pwe David i chon ewe einangen Juda.  Porausen An Jesus Kraist kewe leewo a poputa lon Genesis.  Sia kaeo usun An uputiw lon imwen maan lon Bethlehem, pwal usun An malo won irapenges, me usun An Epwe le mót won an David we leenien móótun nemenem lon Jerusalem lon eu ran epwe le feito.  Mi wesewesen wor popun Ruth a pachelong lein ekkewe Taropwe Mi Pin, Paipel.

     Itelapemongun ei pwuk a fis pwe eu liosun awewe faniten ewe alluken möönsefal ika möönisefal.  Ewe angangen möönsefal a chok tufich ren emon chon ewe eterekes mi kuku ngeni ewe aramas mi osupwang.  Lupwen aramas ra turutiw lon tipis, esap wor emon aramas a tufichin möönisefaliir seni ar tipis.  Kot chok A tongeni möönisefali ekkewe aramas mi mwalechelo.  Nge Kot Esap emon määrärin aramas mi kan ngeniir.  Iei minne, men fokkun auchea pwe Kot Epwe wiliti aramas.  Iei I ewe Aramas Kraist Jesus.  Lon ei pwuk, Boaz a eliosunata fanitach Jesus.  Boaz a aiti ngeni kich usun wisen ewe chon sele epwe möönisefali määrarin mi osupwang.  Pokiten ei pwuk, sia weweiti usun An Kraist A mööni kich.  Lon ei pwuk sia tongeni alleani porausen ruomon aramas mi tongfengen.  Ir aramas mi tekison, nge lupwen sia alleani porauser, sia tongeni kuna liosun ewe tong ach Chon Amanaw A aani fanitei me fanitom, fanitach meinisin.  Lupwen sipwe poputa ach kaeo seni ewe pwuken Ruth, sipwe le kuna usun ei tong mi echipwor.

 MASOUWEN EI PWUK RUTH

Ewe pwuk Ruth a fokkun mwochomwoch.  A wor ruanu sopwun.  Sia tongeni kuna kinikinin ewe pwuk lon ekkewe sopwun:

1. Lon ewe Fonu Moab, Sopwun 1

2. Lon Tanipin Boaz, Sopwun 2

3. Won Ewe Leenien Wichiwich Foun Iran Wiit, Sopwun 3

4. Lon Letipen me Imwen Boaz, Sopwun 4

w. 1 Iwe, a fis pwe lon ekkewe ran lupwen ekkewe soukapwung ra nemenem, a fis lengita lon ewe fonu.  O emon mwan seni Bethlehem-juda a feilo pwe epwe nonnom lon ewe fonu Moab, i me pwuluwan me noun kewe ruomon aat.

     Iei ewe aeuwin wokisin lon Ruth, nge lon ei wokisin sia kaeo chommong mettoch.  A usun ita pwe emon chon aporausa porausen fonufan ika news a wisen kapas.  I a ngenikich ewe fansoun me ewe leeni ikewe ewe poraus a fisita ie.  Ewe fansoun a sereni “lupwen ekkewe soukapwung ra nemenem.”  A fokkun rochopwak ewe fansoun.  Lon óch itiitin, sipwe tongeni apasa pwe iei ewe kinikinin fansoun mi fokkun rochopwak lon uruwon Israel seni lepoputan tori iei.  Sipwe chechemeni pwe ekkewe chon Israel ra kinrosi lon Isip, nge Kot A chimanur ren watten manaman, o uweir lon fonu pön.  Mwirin, I A uweir ngeni ewe Fonuen Pwoon.  Sia ekieki pwe iei ekkewe aramas repwe angang ngeni Kot, ika met?  Nge esap ina.  Lon ei fansoun lupwen ekkewe soukapwung ra wisen nemenem lon Israel, chommong ekkewe chon Israel ra nom towaw seni Kot.

     Lon ewe Pwuken Soukapwung sia alleani porausen ekkewe aramas mi tókolo seni Kot.  Me lepoputan, ir ra angang ngeni Kot, ewe Emon Chok Kot mi Enlet.  Nge mwirin, ir ra kul seni I o ra tipisin fel ngeni kot chofona.  Ra pwal fori watten tipis me fofforingaw.  Nge lupwen ir ra kuna riafou seni chon opwuter, ir ra kokkori Iten ewe Samol, iwe, I A seikata soukapwung pwe repwe selani Noun kewe aramas.  Lon mwuun ikenai sia allea usun porausen ekkewe sou nemenem mi tipisin lisou me fofforingaw – usun chok Samson.  Lon ekkewe ran mi kiroch pokiten tipis, nge ei poraus mi echipwor usun Ruth a fisita.  Lon “ekkewe ran lupwen ekkewe soukapwung ra nemenem.”

     Sia pwal rongorong usun ewe leeni, Bethlehem-juda.  Bethlehem-juda a chuen auchea ngeni kich ikenai.  Jesus Kraist A uputiw lon Bethlehem-juda pokiten ekkewe mettoch ra fis lon ei pwuk Ruth.  Lupwen sipwe aani ewe kol, “O Telinimwen Bethlehem,” sipwe pwal chechemeni ekkewe mettoch ra fis me lom, lon ewe Pwuken Ruth. 

Wewen ekkewe iit:

     Sipwe ekieki usun wewen iten ewe telinimw Bethlehem-juda.  Mi wor wewen iten ekkewe aramas me iten ekkewe leeni mi makketiw usur lon Paipel.  Wewen Bethlehem, “imwen pilawa,” nge wewen Juda, “mwareiti.”  Sia meefi pwe a iei eu telinimw mi fokkun echipwor ach sipwe wilipos lon – ewe imwen pilawa me mwareiti – ika met?  Ewe porausen Ruth a poputa lon Bethlehem, a pwal mwuchulo me lon Bethlehem.  Nge pwal iei ewe telinimw ikewe Jesus A uputiw ie.

     “O emon mwan seni Bethlehem-juda a feilo pwe epwe nonnom lon ewe fonu Moab, i me pwuluwan, me noun kewe ruomon aat.”  Atewe a wilipos lon ewe imwen pilawa me mwareiti, nge i a feilo pwe epwe nonnom lon ewe fonu Moab.  Mi wor óch mettoch a makketiw faniten Moab me lon Paipel, lon Kol Fel 108:9, a apasa, “Moab i sepiei sepien töttöl.”  Iei alon Kot faniten Moab.  Pun nengeni, ekkewe chon Moab ir aramas mi poutmwalilo.  Poputan porausen Moab a fokkun ingaw.  Ewe mwuun Moab esap fis pwe eu mwuu mi mwirino me lon Kapasen Kot.  Wesewesen wewen alon Kot lon Kol Fel pwe, “Moab i ai leenien kapich.”

     Iwe, sipwe nengeni ekkei mettoch.  A wor eu famili—emon mwan me pwuluwan me noun kewe ruomon aat—ra feilo ngeni ewe fonu Moab.  Ra likitalo ewe imwen pilawa me ewe imwen mwareiti, o ra feilo pwe repwe mwongo seni ewe sepien kapich.  Ifa usun, ka fen rongorong an emon epwe fori ei sokkun?  Eli kopwe chechemeni porausen ewe nau mi mwalechelo, Jesus A aporausa ngeni kich usun.  Atewe a likitalo imwen seman, ikewe a wor watten mwongo, o a feilo ngeni ewe fonu mi towaw, nge me ikenan i a echikeiti ekkewe uwan ira minne ekkewe pik ra ani.  Ach Samol Ese pwisin efisata ei poraus.  Ua meefi pwe ekkewe poraus Jesus A ngeni kich resap fis pwe liosun awewe chok, pun ua meefi pwe ekkewe poraus ra wesewesen fis.  A wor chommong nau mi mwalechelo ra su seni imwen semer me iner.  Ekkoch fansoun ra lo, ngang (Dr. McGee) ua afalafal ngeni emon aluwol a su seni imwen seman.  Ewe aluwol a etiwa Kraist, mwirin, aua kokkori seman won phone.  Seman a fokkun meseik!  A wor chommong aluwol ra mwiri ewe nau mi mwalechelo.

     Nge iei sia allea usun porausen eu famili mi mwalechelo.  A fis lengita me lon ewe fonu, iwe, ra sulo.  Ra nuokus.  Sipwe chechemeni porausen semelaper we, Abraham.  Abraham a pwal nuokus lupwen a fis lengita, iwe, atewe a sulo Isip.  A makketiw lon Paipel fan engol me ulungat pwe a fis lengita.  Iteiten fansoun a fis lengita lon Paipel, ewe lengita a fis pokiten Kot A apwungu ekkewe aramas.  Ranin rochopwak me lengita.  Iwe, chon ewe kukkun famili resap luku pwe Kot Epwe tongeni tumwunur lon ewe imwen pilawa me mwareiti, iei minne, ir ra sulo Moab.

     Iwe, lon en fansoun, sipwe kaeo usun chon ei kukkun famili.

Met sia kaeo?

1. Lon ei pwuk sia kaeo pwe David i chon ewe einangen _________________.

2.  Pokiten ei pwuk, sia weweiti usun An Kraist A __________________ kich.

3. Met wewen Bethlehem? _________________________________.

4. Met wewen Juda? ______________________________________.

5. Lon Kol Fel, Kot A apasa pwe “Moab i sepiei sepien _________________.”