Met Sipwe Fori Pwe Sipwe Kuna Manaw?

Ewe Testament Sefö, porausen ach Samol Jesus Kraist.  Ach Kot I Ulumon Lon Emon—Kot Sam, Kot Nau, Kot Ngun Mi Fel.  Kot Nau A wiliti fituk, o A upulong lon fonufan pwe Epwe amanawa kich seni ach kewe tipis.  Pun aramas meinisin ra tipis o ra pwal sip me lukun ewe lingen Kot.  Nge Kot A pwäri An tong ngeni kich, pun lupwen kich sia chuen chok chon tipis, nge Kraist A malo fanitach.  Jesus, Ewe Esap fokkun wor An tipis, A uwei ach kewe tipis, o A ekkesiwili kich le malo fanitach.  Pun liwinin tipis malo; nge ewe liffangen Kot iei manaw esemwuch ren Jesus Kraist ach Samol.  Kraist A malo won ewe irapenges pwe Epwe monatiw liwinin ach tipis me fan mesen Kot Sam, mwirin, I A peiaselo lon ukukun ulungat ran.  Nge mwirin ulungat ran, I A manawsefal seni malo.  Jesus A manaw ikenai.  A nonnom lon lang, nge I A kunók, A tongek, o A mochen amanawók.  I A uta lukun ewe asamen letipom, o A fichifich.  A mochen tolong lon manawom, A mochen töluelo om kewe tipis, o fang ngenuk manaw esemwuch.  En ka tongeni etiwa Jesus ikenai, are kopwe anomwu om lukuluk won I, o etiwa I pwe Epwe om Samol me Chon Amanaw.  Usun a mak, pwe are kopwe pwarata ewe Samol Jesus ren awom, o are kopwe luku lon letipom pwe Kot A amanawasefali I seni malo, kopwe kuna manaw.  Pun emon aramas a kuna pwung ren an luku lon letipan; o a kuna manaw ren an pwarata ren awan.  Ika pwe en ka mochen etiwa Jesus Kraist ikenai, iwe, ka tongeni, ren om aani ei iotek:

 

“Maing Jesus, ua silei pwe ngang emon chon tipis.  Nge ua luku pwe En Ka fen malo fanitei won ewe irapenges, o manawsefal seni malo.  Kose mochen tolong lon letipei, omwusalo ai tipis meinisin, o fang ngeniei ewe manaw esemwuch.  Ua mochen etiwók, pwe En kopwe ai Samol me ai Chon Amanaw.  Kilisou ren Om amanawaei.  Lon Itom, Jesus, ua iotek, Amen.”

 

Ika pwe en ka aani ei iotek o etiwa Jesus lon letipom, iwe, kilisou chapur!  Iei en ka wiliti emon Noun ewe Samol.  Ngeni ir meinisin mi etiwa I, A fang ngeniir ar pwuung pwe repwe wiliti Noun Kot, ngeni ir ekkewe mi luku lon Itan.

 

Nge met kopwe fori iei?  Kopwe alleani noum Paipel iteiten ran o ikkiotek, pwe kopwe nom arap ngeni Om Samol.  Kopwe tongei Jesus ren unusen letipom, ren unusen ngunum, ren unusen ekiekum, pwal ren unusen pochokulom.  Ren om alleani Paipel, epwe fokkun wattelo om lukuluk.  Pun luku a feito seni minne sia rong, nge minne sia rong a feito seni ewe kapasen Kot.  Amwo ewe Samol Epwe efeiochuk lupwen kopwe alleani An kewe kapas lon ei Testament Sefö!

​

Ewe sasing a feito seni ei websait: journeyswiththemessiah.com